မီးလေးနှင့် မုန့်ဟင်းခါး

အဲ အလွမ်းအိမ်က မီးလေးကို ငယ်ငယ်ရွယ်ရွယ်နဲ့ ကောင်းမှုကုသိုလ်လုပ်နေလို့ အားကျတယ်လို့ စီဗုံးမှာ လာအော်ထားတယ် ဟုတ်ကဲ့ အလွမ်းအိမ် ကျေးဇူးကုဋေကုဋာပါ။ လှပါတယ်ဆိုမှ ရေမချိုးရသေးဘူးဆိုတဲ့ စကားပုံကို သွားပြေးမြင်မိလို့ပါ။ မီးလေးက နည်းနည်းလေးတော့ အရွှန်းဖောက်ချင်သား။ တော်တော်ကြာ အလွမ်းအိမ်က သူပြောထားတာလေး လာပြန်သိမ်းသွားဦးမယ် အလွမ်းအိမ်ကို သွားမပြောပြနဲ့နော် တိုးတိုး။

ဖြစ်ပုံကဒီလို မနေ့က မီးလေးရယ် မီးလေးအမေနဲ့ မီးလေးကြီးတော်တို့ ဘုန်းကြီးကျောင်းကို သစ်သီးသွားလှူတယ်။ သွားပို့တဲ့ကျောင်းက ထားဝယ်ကျောင်း ဆွမ်းကပ်ပို့လာပို့တဲ့လူအကုန်လုံးကို ထားဝယ်မုန့်ဟင်းခါးကျွေးတယ်။ မီးလေးက မကြိုက်လို့မစားခဲ့ဘူး။ မေမေတို့စားတာကို ဘေးကထိုင်စောင့် ဖြစ်ခဲ့တယ်။ ထိုင်စောင့်နေတော့လည်း ဟိုလျှောက်ကြည့် ဒီလျှောက်ကြည့်ပေါ့ ဟောတွေ့ပြီ ပို့စ်ရေးဖို့ကုန်ကြမ်း မီးလေးက မုန့်ဟင်းခါးကြိုက်တယ် ထားဝယ်ချက်ကို မကြိုက်လို့တမင်မစားတာ။

ထားဝယ်ချက်ဆိုတာက မုန့်ဟင်းခါးကို ငှက်ပျောခေါင်းတွေနဲ့ချက်ထားတာ ဟင်းရည်မမြင်ရဘူး ငှက်ပျောခေါင်းတွေချည်းပဲ မြင်ရတယ်။ မီးလေးက ငှက်ပျောအူတောင်မကြိုက်တာ၊ ငှက်ပျောခေါင်းဆိုတော့ ပိုဆိုးတာပေါ့။ အန်တီကြီးသုံးယောက် မီးလေးတို့ ထိုင်နေတဲ့ ၀ိုင်းမှာလာထိုင်တယ်။ ကျောင်းသားလေးက ဟင်းရည်လိုက်ပေးမယ်လုပ်တော့ နှစ်ယောက်က မထည့်ဘူးဆိုပြီး အတင်းလုပ်တယ်။ ဟင်းရည်ကို သူ့ပန်းကန်ထဲ မထည့်ပါနဲ့တဲ့ အလယ်တည်ပန်းကန်သာချပြီး အဲဒီပန်းကန်ထဲပဲ ထည့်ပေးပါတဲ့။ ကျောင်းသားလေးက လုပ်ပေးရှာပါတယ်။ ပြီးတော့ ဘာလုပ်တယ်မှတ်လဲ အလယ်တည်ပန်းကန်ထဲကလေ ဟင်းရည်တွေကြီး စစ်ခတ်နေတော့တာပဲ။ အစကမှ ဟင်းရည်သိပ်မရှိတော့ ဟင်းရည်လိုက်သမားကလည်း ထည့်မလောက်ပေါ့ တဖြည်းဖြည်းနဲ့ ပန်းကန်လုံးပြည့်လုနီးပါ ငှက်ပျောခေါင်းတွေချည်းဖြစ်လာတယ်။ နောက်တော့ သူတို့လည်း ထပ်မပြောရဲတော့တာနဲ့ မုန့်ဖတ်ကို အရည်စွတ်တယ်ဆိုရုံလောက်နဲ့ စားသွားကြတယ်။

သြော်…ဘုန်းကြီးကျောင်းလာပြီး ဘယ်လိုလူမျိုးနဲ့တွေ့ရပါလိမ့်လို့အောက်မေ့မိပါတယ်။ ကိုယ်တောင်မစားချင်တာ သူများတွေလည်း ကိုယ်လိုပဲနေမှာပဲလို့ စဉ်းစားမိကောင်းပါရဲ့ ခုတော့ အဲလိုမဟုတ်ဘူး ကိုယ်ကြောင့်သူများလည်း အလုပ်ရှုပ်ရတယ်။ အသက်တွေလည်း ကြီးနေကြပါပြီ တစ်ရာရသင့်ပါတယ် အဲလေ တရားရသင့်ပါတယ်။

ဒီနေ့မနက် မီးလေးအလုပ်ထွက်လာခဲ့တယ် အလုပ်မှာ မုန့်ဟင်းခါးအလှူလုပ်လို့ အားရပါးရစားမယ်ဆိုပြီး လာတာ ဒီရောက်တော့ လုပ်ဖော်ကိုင်ဖက် ညီမလေးတစ်ယောက်နဲ့ အတူစားမယ်ပေါ့။ မုန့်ဖတ်ထည့်တယ်၊ ဟင်းရည်ထည့်တယ်။ အဲအထိ လျောလို့ ဟင်းရည်က ငှက်ပျောအူထည့်မချက်ထားတော့ မီးလေးအကြိုက်ပေါ့။ အကြိုက်စားမယ်ဆိုပြီး ပါးစပ်ထဲလည်းထည့်လိုက်ရော အဲမှာ စတွေ့တာပဲ။ ပါးစပ်ထဲရောက်တာတောင် ဘေးကလူတွေအားနာလို့ မနည်းမျိုချလိုက်ရတယ်။ မုန့်ဟင်းခါးက တူးထားတယ်ထင်တယ် တူးနံ့နံ့ပြီး ခါးနေရောပဲ။ ခုပဲထည့်တယ် ခုထသွားတယ်ဆို အားနာလို့ မနည်းပန်းကန်ထဲက ပြင်ထားတာ လျော့အောင် ကြိတ်မိတ်စားနေရတယ်။ နောက်မနေနိုင်တဲ့အဆုံး ညီမရေ မရတော့ဘူး အစ်မပြေးတော့မယ်လို့ပြောတော့ သမီးလည်းမရတော့ဘူးအစ်မ သမီးလည်းလိုက်မယ်ဆိုလို့ နှစ်ယောက်သား ကိုယ့်အကြောင်းနဲ့ကိုယ်မို့ ဗေဇင်နားပြေးပြီး အမှိုက်ပုံးထဲသွန်တည့်လိုက်တာပေါ့ အားပါး အမှိုက်ပုံးထဲမှာလည်း ကိုယ့်ရှေ့သွန် ထားတာတွေ အများကြီးပါလားလို့ နောက်မှ သိရတာက ဆန်မှုတွေ ပဲတွေ လုပ်တုန်းက တူးသွားတာတဲ့ အဲဒါကို ပြန်ပြင်ထားတာလို့ ပြောတယ်။ ကဲ …. မီးလေးရေ စားချင်အုန်းဟဲ့ မုန့်ဟင်းခါးဆိုပြီး ကိုယ့်ကိုကိုယ်ပဲ အပြစ်တင်မိပါတော့တယ် ….